പ്രയാസം കൊണ്ട് പൊറുതി മുട്ടി
പ്രവാസി ആവാൻ വിധിക്കപ്പെട്ടു ...
മണലാരണ്യങ്ങളിലെ പൊരിവെയിലിനെ
ജീവ ശ്വാസമാക്കി പ്രണയിച്ചു...
ഒട്ടകവും ഈന്തപ്പനകളും കൗതുകത്തിലേറെ
ആശ്വാസമുളവാക്കി...
ഇനി ഞാൻ മടങ്ങുന്നു... ഒരു പരോൾ...
മരുഭൂമിയിലെ മരുപ്പച്ച പോലെ..
ബന്ധങ്ങൾ തേടി...
അമ്മയുടെ മടിയിൽ തല ചായ്ക്കണം ...
ഭാര്യയെ ഒന്ന് വാരി പുണരണം...
നിറ വയറിൽ മുഖം ചേർത്ത് അവൾക്ക് ധൈര്യമേകണം
ഇത്തവണ നിനക്കൊപ്പം  ലേബർ റൂമിനു പുറത്തു
ഞാനുണ്ടെന്നു...മകൾക്കൊപ്പം വഴക്കടിക്കണം...
പിന്നെ എല്ലാവരുടെയും കണ്ണ് വെട്ടിച്ചുകൂട്ടുകാർക്കായി കരുതിയ "മറ്റവനെ"
തെങ്ങിൻ തോപ്പിലിരുന്നു പങ്കു വെക്കുമ്പോൾ
പ്രവാസ ജീവിതത്തിലെ സുഖലോലുപതയെ പറ്റി
വാ തോരാതെ ബഡായി വിടണം..